|
不當記者之花 並無不當
有「新聞之花」及「毒男女神」之稱的前無綫新聞主播鄭萃雯，07年大學畢業後，正式在無綫新聞部擔任記者。11年與同台攝影師Anson結婚，16年元旦日誕下一對孖仔（卓言及卓喬），「升呢」為雙職媽媽。去年，Karen為了一對兒子放棄十年的記者生涯，開展另一個新階段，「本身我喜歡當記者，以為可以做一世，但我同丈夫都要返Shift，孖仔由我父母湊，但我們住不同地區，考慮到要幫佢哋搵學校，同想多些時間陪佢哋，所以就辭職。」
由於Karen做記者時，專門負責醫療綫，加上，作為新手媽媽累積不少關於幼兒健康的經驗，於是在朋友創辦的醫療電子平台訪問醫生、開Live、寫專欄，以及主持香港電台《大氣候》和《精靈一點》兩個節目，還有出書等，工作比以前繁忙，但可以彈性安排，晚上回家陪孖仔吃飯、講故事等，親子時間增加，難怪一對孖仔喜歡黏着媽媽。
治好濕疹
由記者變身為醫療KOL的Karen，因為工作緣故，為一眾家長向醫生反問問題，作發聲的角色，更經常就囝囝的健康問題「影相問症」，有次更救了大孖一命。她憶述：「當時大孖歲多，發燒三十八度，本來睇了醫生，但食了一次藥都冇退燒，並開始精神呆滯，於是我向醫生朋友求救，佢叫我拍一分鐘兒子呼吸嘅片段畀佢睇，跟住就叫我立即帶大孖睇急症。原來佢感染咗幼兒常見嘅呼吸融合細胞病毒（RSV），引致支氣管炎。當時呼吸頻率係七十多，比正常快一倍，立即上病房聞氣，住了幾日醫院。」
Karen因為裝備了不少育兒的資訊，所以對孖仔的健康不會過度緊張，好似他們自兩個月大便開始患有濕疹，不過，經兒科、皮膚科及兒童精神科醫生的教路，加上她的悉心護理，令孖仔的濕疹情況大為改善，連醫生都大讚她，「醫生話如果兩歲前控制到濕疹情況，之後好大機會可以斷尾，所以我要相信醫生同實踐，就算我有養狗同有公仔，都要保持衞生、乾淨，經常吸牀蟎及清潔，唔會太過緊張。」
重視分享
Karen重視孖仔學習分享，「好多獨生小朋友都較自我，佢哋一出世就要學習分享，分享媽媽、玩具等。我不會買兩份玩具，佢哋玩一次就要畀對方玩，否則就無得玩，所以『自我期』較短。」一對孖仔今年入讀K1，都是就讀屋企附近的幼稚園，全因她想孖仔有足夠的休息；暫時只學游泳，目的是強身健體和「放電」，未有其他興趣班。對培育孖仔都是處之泰然，勿忘健康、快樂的初衷。
|
|
|
|
